منتديات شباب القريه المميزون
السلام عليكم ورحمة الله وبركاته
زائرنا الكريم
نتقدم إليك بأسمى آيات الترحيب
ونتمنى منك الأنضمام إلى أسرتنا لنسعد بمشاركاتك ومساهماتك الفعالة
مع خالص تحياتي العطرة
محمد عزالدين
بحـث
 
 

نتائج البحث
 


Rechercher بحث متقدم

المواضيع الأخيرة
» هل نستطيع العوده ؟؟؟؟؟؟؟؟
الإثنين يناير 09, 2017 8:32 pm من طرف أحمد

» ممكن تصلي علي النبي
الإثنين يناير 09, 2017 8:28 pm من طرف أحمد

» وإن عدتم عدنا
السبت نوفمبر 21, 2015 12:33 am من طرف أحمد

» أولادنا في رمضان
الإثنين يونيو 30, 2014 4:53 pm من طرف أبويوسف

» أكبر وأحدث خطوط انتاج الفحم المضغوط(اصابع)
السبت يناير 25, 2014 2:42 am من طرف eslam arafa

» فحم مضغوط فحم طبيعى
السبت يناير 25, 2014 2:41 am من طرف eslam arafa

» أحدث ماكينة نشارة خشب وتقطيع اخشاب
السبت يناير 25, 2014 2:37 am من طرف eslam arafa

» وحشتونى
الخميس أغسطس 22, 2013 4:42 am من طرف على شاهين

» صورى فى شم النسيم 2012
السبت أكتوبر 20, 2012 7:32 pm من طرف عمر جابر

التبادل الاعلاني
احداث منتدى مجاني
التبادل الاعلاني
احداث منتدى مجاني

أنا مش ورقة!!! (رائعة بإذن الله)

استعرض الموضوع السابق استعرض الموضوع التالي اذهب الى الأسفل

أنا مش ورقة!!! (رائعة بإذن الله)

مُساهمة من طرف زهرة الإسلام في الأحد أغسطس 15, 2010 4:33 am

السلام عليكم ورحمه الله وبركاته

احنا هنعيش قصه مع ابطالها محمد وعبد الرحمن سنة اولي طب بالمناسبة هما كانوا اصحاب منذ الصغر
ممكن تكون القصة طويلة او قصيرة بس ان شاء الله هنستفيد منها

المهم ندخل في احداث قصتنا


الحلقة الاولي

يصحي محمد اول يوم ليه في الكليه ايه ده الساعه 10 طبعا محمد صاحي مفزوع اول محاضرة
راحت عليه ....

ينادي محمد علي والدته

ماما ماما انت مصحتنيش ليه ينفع كده من اول يوم مفيش التزام
والدته تدخل انا قعدت اصحي فيك من الساعة7 وكالعادة صحيني بعد 5 دقايق لا لابعد ربع ساعة لحد ماوصلنا الساعة 8 وانت نايم في سابع نومه وانا زهقت منك
ازاي ده انا محستش بأي حاجه خالص انا زعلان اوي

وهنا يدخل والد محمد زعلان اوي ياحبيبي لك حق تزعل والايبقي ماعندكش دم

محمد:مش كده برده يابابا قول لماما اصلها مش مقدرة.

الوالد: مش مقدره لا مالهاش حق اتصدق بالله انت ماعندكش دم.

محمد: ليه كده بس انا مالي ماما هي اللي ماصحتنيش بذمه.

الوالد: ياسلام ياخوي انا مابكلمش علي كده انت زعلان اوي لما فاتتك اول محاضرة.
طب ماانت ضيعت صلاة الفجر انهارده مازعلتش اوي كده ليه وللاانت خلاص بعد امتحانات الثانويه العامه مش هشوفك تاني في الجامع .

محمد: في سره انا فاتتني محاضرة الكليه بس الحمد لله ربنا عوضني خيرا منها محاضرة ابويا
ده بدل مايقولولي تفطر ايه ياحبيبي نروح نحضره ماعلينا.

الوالد: انت سكت ليه نمت؟؟

محمد:لالا ابدا خلاص سماح المرة دي انا هجهز بقي قبل مايفوتني باقي المحاضرات.

وهنا يرن موبايل محمد الظاهر صاحبه عبد الرحمن بيطمن عليه

محمد:ايوه ياعبده ازيك عامل ايه؟؟

عبد الرحمن: الحمد لله رب العالمين انت فين؟؟

محمد :انا علي السرير اصلي راحت عليه نومه.

عبد الرحمن: ولا يهمك تتعوض المهم انا مستنيك ماتتاخرش يلا.

محمد : ماشي مسافه السكه ويجهز محمد وينزل عشان يقابل عبد الرحمن.

محمد: كل دي زحمه انا هركب ازاي وبعد عناء طويل محمد يركب الميكروباص وينطلق الي الكليه .

ويفاجا محمد بواحده تيجي تقعد جنبه...

وبعد فتره تساله هو حضرتك في كليه ايه
محمد: نعم طبعا هو سامع بس مستغرب السؤال
تعيد البنت السؤال مرة تانيه
محمد: ليه حضرتك فيه حاجه؟؟

البنت :لا ابدا بس زي مانت عارف ان النهارده اول يوم في العام الدراسي وانا مااعرفش اي حاجه في الجامعه فبسال حضرتك ممكن نكون في نفس الكليه فتعرفني عليها وكده يعني....

محمد: يفكر فترة طويله ياتري اقولها ايه دلوقتي اروح معاها كليتها واخدمها واعمل فيهامعروف طب وعبد الرحمن اعمل فيه ايه .....

[glow=6600ff]ولكن فجاه [/glow]يفتكر محمد قصة سيدنا موسي عليه السلام مع المرأتين وكيف كان حياءوه وادبه معهم وكذلك حياء المرأتين

محمد : بصوت حازم هو حضرتك في كليه ايه
البنت : في تجاره
محمد : خير انا مش في تجاره ومعرفش حاجه عنها وكأنه يقول لها اسكتي واياكي تتكلمي تاني...

وبعد عناء ينزل محمد من الميكروباص واخيرا هيقابل عبد الرحمن

ياتري ايه اللي هيحصل بينهم؟
هذا ماسنعرفه في الحلقه القادمه ان شاء الله


عدل سابقا من قبل زهرة الإسلام في الإثنين أغسطس 16, 2010 11:00 pm عدل 1 مرات
avatar
زهرة الإسلام
وسام التميز والإبداع
وسام التميز والإبداع

عدد المساهمات : 57
نقاط : 2807
السٌّمعَة : 7
تاريخ التسجيل : 12/08/2010

الرجوع الى أعلى الصفحة اذهب الى الأسفل

رد: أنا مش ورقة!!! (رائعة بإذن الله)

مُساهمة من طرف زهرة الإسلام في الأحد أغسطس 15, 2010 4:39 am

الحلقة الثانية


محمد يدخل الكلية يدور علي عبد الرحمن وبعد لف كتير في الكلية ايه ده ده شبه عبد الرحمن خالص


لا لا بس اكيد مش هو ايه المقشة اللي في وشه دي هههههههههههههه وللا البنطلون شكل الترزي ضحك عليه وخد باقي القماش وقعد يفحصه من فوق لتحت لا دا اكيد مش عبد الرحمن ولو عبد الرحمن امتى وازاي وليه حصله كده ويقطع تفكير محمد صوت عبد الرحمن...


عبد الرحمن:ايه يامحمد هو انا كنت بايت معاك امبارح وللا ايه ده بدل ماتخدني بالحضن قاعد تبصلي من فوق لتحت.


محمد :لا ابدا ياعبده وياخده بالحضن وحشتني اوي انا معرفتكش يابني انت ايه اللي حصلك 3 شهور اجازة يحصلك كل ده ايه اللي حصلك؟!!!!


عبد الرحمن :بعدين احكيلك المهم انت ازاي تفوت اول محاضره من اولها كده طب حتي خليك ملتزم اول يوم.


محمد:صحيح عملتوا ايه من غيري.


عبد الرحمن:طبعا الدكتور كان زعلان جدا انك محضرتش وكان عايز يلغي المحاضرة لولا ان العدد كان كبير ..


محمد:انت بتتريق؟؟


عبدالرحمن:مانت اللي سؤالك غريب هنعمل ايه يعني من غيرك لاانت الكمبيوتر ولا البروجيكتور وللا حتي الميكروفون عشان المحاضرة تتعطل من غيرك..


محمد:ماشي ياعبده بكره تعرف اهميتي.


عبدالرحمن:المهم انت ازاي راحت عليك نومه والفرق بين جلسة الشروق والمحاضرة قليل يعني ماتلحقش تنام فيه؟؟!!


محمد:مش اما اكون الاول صليت الفجر ابقي اقعد جلسة الشروق


عبدالرحمن:يعني انت ضيعت صلاة الفجر انهارده ازاي؟!!!


محمد:يلا ابدا المحاضرة التانيه كلي اذان صاغيه امال يابني لومكناش دفنينه سوا ..
عبد الرحمن:دفنا مين ؟؟


محمد:ايه يابني احنا مش كنا بنصلي ايام الامتحانات وبعد كده بئي انت عارف انا بحب النوم اد ايه ...
اوعي تقولي ان انت لسه بتصلي الفجر!!!!!


عبدالرحمن:انا بفضل الله بصلي كل الصلوات في المسجد.


محمد:بجد عليه انا برده الكلام ده؟؟!!


عبدالرحمن:المهم دلوقتي يامحمد انا هرن عليك كل صلاة عشان اذكرك بيها وبالذات صلاة الفجر بس اياك تفتح عليه انا بقولك اهو والا هخليك تشحنلي...


محمد:براحه بس عليه احنا اول يوم في الدراسه..


عبدالرحمن:ماهو عشان كده لازم نفتح صفحه جديده مع ربنا احنا فرطنا كتير اوي يامحمد..


محمد:في سره فرطنا في ايه انا مش فاهم اي حاجه؟!!!


عبدالرحمن:هنبتدي من انهارده ..
اول حاجه لازم تعرفها اهميه صلاة الفجر
انا لواديتك صندوق فيه طوب وصندوق فيه دهب وقلتلك وصلهم مكان معين ياتري اهتمامك بالاتنين هيكون نفس الاهتمام؟؟


محمد:لا طبعا دا حتي لو صندوق الطوب ضاع بسيطه هشتري صندوق والطوب اهو كتيرفي الشارع لكن صندوق الدهب لو ضاع هعوضه ازاي؟؟


عبدالرحمن :الحمد لله اتفقنا بص بقي صلاة الفجر اغلي من كنوز الدنيا يعني لوضاعت مش هتعرف تعوضها...


[rainbow]1-قال رسول الله صلي الله عليه وسلم
( من صلى الصبح في جماعة فكأنما صلى الليل كله ) رواه مسلم .



2- قال رسول الله صلى الله عليه وسلم
( من صلى الفجر فهو في ذمة الله (حفظه) فلا يطلبنكم الله بشئ من ذمته ) حديث صحيح
رواه الطبراني ومسلم بلفظ مشابه .



3-قال رسول الله صلي الله عليه وسلم
( بشر المشائين في الظلم إلى المساجد بالنورالتام يوم القيامه ) صحيح .[/rainbow]

كده اتفقنا ان صلاة الفجر مهمة ماشي ..


محمد:ماشي ياسيدي كمل باقي المحاضره اما اشوف اخرتها معاك


عبد الرحمن:بص بئي انت قبل ماتنام لازم تكون متوضي وتقول اذكار النوم بكره ان شاء الله هجيبلك كتاب حصن المسلم
وتكون مخلص انك عايز تقوم بجد تصلي ولازم تكون عارف ان صلاه الفجر دي ترمومتر علي صدقك شوف بئي انت صادق ولا .....
خلاص اتفقنا يامحمد هرن عليك وهستناك تكنسل


محمد:خلاص خلصت المحاضرة يلا بئي قولي ايه اللي غيرك كده


عبدالرحمن :هوا نا ههرب منك ماحنا مع بعض اهو يابني ان شاء الله هحكيلك تعالي بس نروح الجامع لان الظهر قرب يأذن وبعد الصلاه ان شاء الله هحكيلك


وفي الجامع عبد الرحمن يقوم يصلي السنة


عبد الرحمن:انت مش هتصلي السنة


محمد:دا كويس اني بصلي الفرض يابني


عبدالرحمن :ماشي ياسيدي بس الرسول صلي الله عليه وسلم بيقول من صلي اثنا عشر ركعه في اليوم والليله بني الله له بيتا في الجنه


محمد :ماشي ماشي صلي انت بس وخليني اقعدلي شويه بئي عشان تحكيلي بين الاذان والاقامه


محمد :يراقب عبد الرحمن وهو بيصلي ايه دا الواد اتغير 180 درجه هو ايه اللي حصله ماكنش بيتكلم كده ابدا الواد اتجنن وللا ايه انا خايف عليه لاحول ولاقوه الا بالله ايه ده وكمان بئي بيصلي كويس ماشاء الله ايه الخشوع والسكينه دي هو مستني نتيجه امتحان تاني وللا ايه


ياتري ايه اللي حصله 3شهور يتقلب القلبه دي؟؟!!
avatar
زهرة الإسلام
وسام التميز والإبداع
وسام التميز والإبداع

عدد المساهمات : 57
نقاط : 2807
السٌّمعَة : 7
تاريخ التسجيل : 12/08/2010

الرجوع الى أعلى الصفحة اذهب الى الأسفل

رد: أنا مش ورقة!!! (رائعة بإذن الله)

مُساهمة من طرف زهرة الإسلام في الأحد أغسطس 15, 2010 4:44 am

الحلقة الثالثة

ينتهي محمد وعبد الرحمن من صلاة الضهر

محمد:يلا بقى احكيلي..

عبدالرحمن:ياعم اصبر حتي استني لما نختم الصلاة ونخرج من الجامع هحكيلك واحنا مروحين.

محمد:ماشي انا صبرت عليك كتير

عبدالرحمن:معلش استحملني

ويخرج محمد وعبدالرحمن من الجامع ويعيشوا ازمه المواصلات
يركب محمد وعبد الرحمن اخيرا

محمد :يهزر مع عبد الرحمن مابلاش بخل يااخي وهات عربيتك معاك وارحمنا من الزحمه دي

عبد الرحمن :ماشي ماشي

محمد:يلا كلي اذان صاغية

عبدالرحمن:بص ياسيدي انت عارف طبعا محمود ابن خالتي انا وهو ومجموعه من اصحابنا نوينا بعد الثانويه العامه وقرفها اننا نسافر بعيد ونصيف بئي ونعيش حياتنا
وبالفعل سافرنا وقضينا ايام حلوه فسح بئي وسهر واغاني وافلام وملاهي كانت ايام حلوه

محمد:ايه ده وانا ليه ماقولتليش

عبد الرحمن:ماتقطعنيش يامحمد
المهم واحنا راجعين كان السواق مشغل اغنيه انا واصحابي كنا بنحبها اوي وكنا قاعدين نصقف
لقينا واحد مانعرفوش بيدي للسواق شريط ويقوله لوسمحت من فضلك خد شغل ده احسن
طبعا كلنا اعترضنا واولنا السواق المهم الشخص ده قعد يتكلم واحنا ودن من طين والتانيه من عجين كلامه طبعا زي قلته انا تقريبا ماسمعتش كلمه منه
وفجاه الاتوبيس كان هيعمل حادثه بس ربنا ستر
وكأن دي كانت رساله من ربنا لينا بس احنا اللي مابنفهمش

محمد:يااااااسلام وده بئي اللي غيرك هو انت بقيت حساس اوي كده هههههههههههههههه

عبدالرحمن:شكلي مش هكملك الحكايه

محمد:صحيح انا نسيت أسالك ع البت سها اللي كانت معانا في درس الكيميا البت دي اللي انت كنت بتحبها صحيح هي دخلت معانا طب

عبدالرحمن:يارب صبرني اديك قعدت تقاطعني لحد مامحطتي جت انا هنزل واكملك بكره

محمد:بس استني طب تعالي اتغدى عندي وكملي القصه ماما عامله فراخ هديك فرخه بحالها بس تعالي

عبدالرحمن:جزاك الله خيرا المهم انا نسيت اقولك ابقى اظبط المنبه عشان صلاة الفجر وانا برده هرن عليك

محمد:طب يلا انزل قبل ما السواق يرميك من الشباك

ويودع عبد الرحمن صاحبه محمد

ومحمد:يفضل قاعد وينزل المحطه اللي بعده اما نشوف اخرتها مع الواد عبده دي ايه

ويدخل محمد البيت ماما انا جعان اوي يلا فين الفراخ

والد محمد:يابني اصبر شويه احكيلي عملت ايه انهارده في الكليه

محمد:دا انا عملت عمايل تخيل يابابا الواد عبد الرحمن بيصلي والله وقال ايه هيرن عليه كل صلاه عشان يذكرني بيها وانا قال ايه اكنسل عليه واقوم اصلي

والد محمد:وايه الغريب في كده عقبالك يابني ربنا يهديك

وبعد اما ينتهوا من الغدا

محمد:صحيح انا هدخل انام واسيب الموبايل واما الواد عبد الرحمن يرن العصر والمغرب والعشاء والفجر تكنسلوا عليه وتقوموا تصلوا

ها مين هياخد الموبايل وللا بابا ياخده عصر ومغرب وماما تاخده عشا وفجر

والد محمد:وسيادتك هتعمل ايه هتنام من دلوقتي لحد تاني يوم الكليه

محمد:الله اعلم انا تعبت اوي انهارده

ويدخل محمد ينام ويسيب الموبايل

[read]ياتري عبد الرحمن هيعمل ايه بكره مع محمد ان شاء الله؟؟[/read]
avatar
زهرة الإسلام
وسام التميز والإبداع
وسام التميز والإبداع

عدد المساهمات : 57
نقاط : 2807
السٌّمعَة : 7
تاريخ التسجيل : 12/08/2010

الرجوع الى أعلى الصفحة اذهب الى الأسفل

رد: أنا مش ورقة!!! (رائعة بإذن الله)

مُساهمة من طرف أحمد في الأحد أغسطس 15, 2010 11:03 pm

ياريت باقى الحكايه الا هى جميله أوى
وفيها كمان عظات وعبر وياريت تقرأوها
فبألرغم من طولها إلا انها رائعه
جزاك الله خيرا اختى فى الله
وننتظر باقى الحلقات
avatar
أحمد
مشرف مميز
مشرف مميز

عدد المساهمات : 473
نقاط : 3649
السٌّمعَة : 14
تاريخ التسجيل : 29/03/2010
العمر : 29
الموقع : المنتزة الإسكندرية

http://sna7yakerama.mam9.com/forum

الرجوع الى أعلى الصفحة اذهب الى الأسفل

رد: أنا مش ورقة!!! (رائعة بإذن الله)

مُساهمة من طرف زهرة الإسلام في الإثنين أغسطس 16, 2010 1:25 am

الحلقه الرابعة

بالفعل عبد الرحمن يرن علي محمد في كل صلاه ومامته تكنسل

وتروح تصحي محمد وهو لا حياة لمن تنادي وبالقوه يصحي عشان يروح
الكليه

عبدالرحمن ومحمد يتقابلوا في المحاضرة ويقعدوا جنب
بعض

عبدالرلحمن:ماشاء الله عليك يامحمد كنسلت عليه حتي في صلاة
الفجر شكل الكلام بيجيب معاك نتيجه

محمد:اه امال ايه وفي سره ربنا يخليلي ماما
وبابا

وبعد
دقايق يدخل الدكتور وبعد مرور ربع ساعة من
المحاضرة

محمد:الحق ياعبده البت سها اهي هي جايه متاخر ليه ههههههه
مش تقولها تبئي تقعد جلسه الشروق عشان تيجي بدري
صحيح هو
انت قلبتها وللا ايه دي قرفتني في الاجازه اسئله عليك لدرجه اننا افتكرناك مت هو
انت صحيح كنت في السعوديه بتعمل ايه

عبدالرحمن :هو انت مش هتبطل كلام

محمد:لا انا عايز اعرف بقى ايه اللي حصل
بينكم

عبدالرحمن:طب ايه رايك تستأذن من الدكتور ونطلع احكيلك بره
وللا علي ايه هو هيطردنا دلوقتي

محمد:خلاص خلاص

وبعد شويه يتكلم
محمد تاني:هو احنا مش هنعمل صحوبيات

عبدالرحمن :لا ان شاء الله نعمل ربنا
ييسرالامور

محمد:طب الحمد لله

عبدالرحمن:لا مش اللي في دماغك

وبعد
انتهاء اليوم الدراسي

عبدالرحمن :يلا عشان نصلي الضهر ونروح واحكيلك في
الطريق

وفي طريقهم للبيت

عبدالرحمن:انا مش عايز سها تشوفنا ولو شافتنا نهرب منها بأي
طريقه

محمد:هو انت يابني عامل عامله وبعدين ماتشوفناش ازاي مش
هنحضر وللا هنلبس طقيه لخفه وللا نبقى نقعد تحت البنش في المحاضره
احسن
انت مالك بقيت غريب كده ليه

عبدالرحمن :اسمعني بس ربنا ان شاء الله هيصرف نظرها
عننا

محمد:طيب اما اشوف اخرتها

عبدالرحمن :بص ياسيدي

باختصارالحكايه
....
محمد:لا انا عايز تفصيل ممل

عبدالرحمن:ماشي ياسيدي
انا وسها
تقريبا اهلنا اتنازلوا عن وظيفتهم الاساسيه

محمد:اه انا كده فهمت الحكايه وعشان كده انت شاحت الهدوم
اللي انت لابسها ومش معاك فلوس حتي تحلق لاحول ولاقوة الابالله وطبعا مش معاك فلوس
عشان تخرج سها وتفسحها طب كنت اتصل بيه اسلفك

عبدالرحمن :تسلفني ايه انت
مابتفهمش

محمد:ليه الغلط ده بس
خلاص كنت
هخلي بابا يشوف لوالدك شغلانه جديده

عبدالرحمن:بص انت تروح تتغدى عشان شكلك جعان عشان كده مش
فاهم وبكره هفهمك
واحكيلك
علي كل حاجه

محمد:مااااااااشي

عبدالرحمن: السلام عليكم ورحمه الله
وبركاته

محمد:وعليكم السلام ورحمه الله وبركاته

وبعد اما عبد الرحمن يودع محمد

محمد:هو الواد ده بيتكلم كلام كبيرانا مش اده وللا انا فعلا
اللي جعان ومش فاهم حاجه؟؟!!!!
avatar
زهرة الإسلام
وسام التميز والإبداع
وسام التميز والإبداع

عدد المساهمات : 57
نقاط : 2807
السٌّمعَة : 7
تاريخ التسجيل : 12/08/2010

الرجوع الى أعلى الصفحة اذهب الى الأسفل

رد: أنا مش ورقة!!! (رائعة بإذن الله)

مُساهمة من طرف زهرة الإسلام في الإثنين أغسطس 16, 2010 1:30 am

الحلقة الخامسة

وبعد انتهاء اليوم الدراسي كالعاده

عبدالرحمن:محمد انت فهمت حاجه من اللي قلتها امبارح

محمد:بصراحه ومن غير ضرب لا

عبدالرحمن:طيب بص يامحمد انا وسها تقريبا عايشين نفس الظروف عايشين غربة في وسط اقرب الناس لينا
عايشين غربة يشكيها البيت بجدرانه فكيف بمن تحويه الجدران
اهلي انا وهي اتنازلوا عن وظيفتهم الاساسيه وهي التربيه والاحتواء
لا وياريت المأساه وقفت عند كده لا كمان كانوا موافقين علي علاقتنا انا وسها وكأنهم شالوا حمل تقيل من علي اكتافهم وظنوا انهم بكده استريحوا مننا
معرفه اهلنا بعلاقتنا وموافقتهم عليها كان معناها عندنا ان خلاص الامر المحرم بئي مباح لا دا ممكن كمان نقول عليه حلال مادام اهلنا عارفين ايه تاني هيهمنا
ربنا يغفرلنا ذلاتنا وتقصيرنا
المهم لما نتيجه الثانويه العامه ظهرت انا وسها تقريبا كان مجموعنا واحد وقلنا ان شاء الله ندخل طب سوا وهنقضي 6 سنين مع بعض ومفيش حاجه هتفرقنا وقعدنا نحلم كتير اوي
وفي نفس يوم النتيجه محمود ابن خالتي اتصل بيه وقالي انا عازمك انت وسها بمناسبه نجاحكم علي حفله المطرب(.........)الحفله دي هتبقي جميله اوي والمطرب هيكسر الدنيا هستناكوا تفوتوا عليه متتاخروش بئي
وبالفعل اتصلت بسها وحددت معها ميعاد وقابلنا محمود وروحنا الحفله سوا ووقت ماكنا في الحفله كنا فرحانين ومبسوطين اوي
لكن فجأه في نص الحفله محمود قالي
انا مش قادر اخد نفسي حاسس ان مفيش ذره هوا
انا قلقت عليه جدا وقررت انقله المستشفي وقلت لسها روحي انت عشان متتاخريش وانا هطمنك ان شاء الله
وفي طريقنا للمستشفي اتصلت بخالتي وقلتلها احنا في طريقنا دلوقتي للمستشفى لان محمود تعبان شويه
ولما وصلنا للمستشفي حاله محمود كانت بتسوء
وجه دكتور اول ماشاف محمود قاله قول لا اله الا الله
قول لا اله الا الله والدكتور يكررها كتير وفي كل مره الدكتور يقولها محمود يقوله انا فرطت كتير...... انا فرطت كتير اوي
والدكتور مازال يردد قول لااله الا الله وحمود مابيقولش الا انا فرطت كتير وانا مش مستوعب اللي بيحصل
قلت لمحمود انت فرطت في ايه فرطت في ايه يامحمود قولي
وقبل مايجاوبني لقيت الدكتور بيقول (انا لله وانا اليه راجعون)
قلت للدكتور يعني ايه يعني ايه رد عليه
الدكتور:انا لله وانا اليه راجعون
يعني محمود مات خلاص ......ازاي دا كان لسه معايا في الحفله ازاي مات ازاي دا لسه صغيرومكانش تعبان مات ازاي
دامكانش عارف انه هيموت................... وفرط كتير اوي في ايه ياريت قالي

يتبع ان شاء الله
avatar
زهرة الإسلام
وسام التميز والإبداع
وسام التميز والإبداع

عدد المساهمات : 57
نقاط : 2807
السٌّمعَة : 7
تاريخ التسجيل : 12/08/2010

الرجوع الى أعلى الصفحة اذهب الى الأسفل

رد: أنا مش ورقة!!! (رائعة بإذن الله)

مُساهمة من طرف زهرة الإسلام في الإثنين أغسطس 16, 2010 1:39 am

الحلقة السادسة

محمد:بص ياعبد الرحمن من اولها كده احنا مش هنخرج من الكليه انهارده الا لما تحكيلي كل اللي حصلك

عبدالرحمن:ماشي ياعم محمد
انت عارف انا كل ماافتكر يوم وفاة محمود احس اوي بمعني الأية

(أَوَمَنْ كَانَ مَيْتاً فَأَحْيَيْنَاهُ وَجَعَلْنَا لَهُ نُوراً يَمْشِي بِهِ فِي النَّاسِ كَمَنْ مَثَلُهُ فِي الظُّلُمَاتِ لَيْسَ بِخَارِجٍ مِنْهَا كَذَلِكَ زُيِّنَ لِلْكَافِرِينَ مَا كَانُوا يَعْمَلُونَ )122الأنعام
الحمد لله رب العالمين انا كنت ميت وربنا احياني فله الحمد سبحان من يحيي ويميت
انا بعد ماسمعت الدكتور وهو بيقول انا لله وانا اليه راجعون خرجت من المستشفى
من غير ماستنى خالتي ولا اي حد انا كنت شبه فاقد للوعي خرجت ومكنتش عارف
اروح فين ومعرفش مشيت اد ايه
وطول ماانا ماشي في الطريق شويه اضحك وشويه اعيط كنت بكلم نفسي ساعات
بصوت عالي وساعات بيني وبين نفسي
محمود مات لا انا مش مصدق انا اكيد بحلم
محمود مات ازاي ممكن كان تعبان وانا معرفش
محمود مات دا كان لسه قاعد معايا في الحفله كان لسه بيكلمني مات ازاي
محمود مات يعني مش هشوفه تاني
طب وفرط في ايه
فرط في ايه فرط في ايه كتير وخلاص مات ومش هيعرف يعوضه؟!!!!
مات لاااااا ازاي دا لسه صغير
يعني خلاص مش هيرجع بيته تاني ولا هيكون مع اهله
محمود هينام لوحده انهارده
مفيش حد هيبقى معاه
بس ازاي دا القبر ضلمه اوي
محدش هيرضى يكون معاه يونسه
لا محمود مامتش انا اكيد بحلم دا لسه كان بيعزمني علي الحفلة في ثواني كده مات
ممكن يكون الدكتور غلطان اه ممكن....... ممكن خالتي لما تروح المستشفي تلقيه
عايش اه ممكن
اكيد هيكلمني دلوقتي
وهسأله فرط في ايه
طب هو فرط في ايه حد يفهمني فرط في ايه
لا ااااااااا هو اكيد مات الدكتور هيهزر معايا في الحاجات دي
خلاص ياعبد الرحمن هو اكيد مات
طب.........
فجأة كده مات ممكن ......كنت انا اللي ابئي مكانه
طب مااحنا الاتنين زي بعض
مقضيين حياتنا اغاني وافلام وبنات ووووووووووو
ايه بقى اللي مفرطين فيه
كان نفسي اوي يامحمد حد يسمعني كان نفسي اشكي حالي لحد
كان نفسي ابويا او امي حد فيهم يفهمني كان نفسي اترمي في حضن اي حد فيهم
انا مش يتيم
لا انا يتيم مش لاقي حد فيهم يحس بيه وفي الوقت ده اللي حسيت فيه اني لوحدي في
الدنيا دي حسيت اني في غربه
حسيت ان محدش بيحبني ولاحد بيسمعني كنت تايه
ووقتها بطلت اضحك وبقيت مش قادر اوقف دموعي...........
وكأنها كانت محبوسه ومستنيه حد يفرج عنها
هو ان بعيط علي محمود وللا بعيط علي نفسي وللا بعيط علي ايه بالظبط
طب هو محمود ارتاح كده وسابني لوحدي تايه
اعمل ايه.... اعمل ايه بس حد يقولي حد يعبرني انا برده انسان انا مش يتيم.......
وفي وسط الحيرة دي
لقيت سها بتتصل بيه.... 
ارد عليها جايز الاقي عندها جواب وللا بلاش ارد احسن

ياتري عبد الرحمن هيرد علي سها وللا.......؟!!!!!

يتبع ان شاء الله
avatar
زهرة الإسلام
وسام التميز والإبداع
وسام التميز والإبداع

عدد المساهمات : 57
نقاط : 2807
السٌّمعَة : 7
تاريخ التسجيل : 12/08/2010

الرجوع الى أعلى الصفحة اذهب الى الأسفل

رد: أنا مش ورقة!!! (رائعة بإذن الله)

مُساهمة من طرف محمد عزالدين في الإثنين أغسطس 16, 2010 9:15 pm


والله هي قصة جميلة جداً من بدايتها
واحنا متشوقين نعرف باقي الحلقات المسلسلة
بسرعة لأنها في غاية الروعة
بس أنا خايف يطلع مسلسل من 30 حلقة
ونقعد نتابع لغاية أخر شهر رمضان

*****************************************************
avatar
محمد عزالدين
المدير العام
المدير العام

عدد المساهمات : 431
نقاط : 3999
السٌّمعَة : 14
تاريخ التسجيل : 25/10/2009
الموقع : http://ayaareg.ahlamontada.net

الرجوع الى أعلى الصفحة اذهب الى الأسفل

رد: أنا مش ورقة!!! (رائعة بإذن الله)

مُساهمة من طرف زهرة الإسلام في الإثنين أغسطس 16, 2010 10:58 pm

الحلقة السابعة

محمد:وعملت ايه رديت عليها وللا لا

عبدالرحمن:قلت لاااااااا انا مش هرد عليها بس لقيتها بتتصل
تاني وتالت قلت خلاص اما ارد عليها انا كده كده ضايع

ومش لاقي حد يسمعني مهياش فارقه كتير

سها:ها ياعبده عملتوا ايه

عبدالرحمن:محمود مات ياسها

سها:بلاش هزار.....انت فين دلوقتي

عبدالرحمن:بقولك محمود مات ياسها

سها:مات ازاي

عبدالرحمن:ده السؤال اللي عايز اعرفه

سها:اكيد كان تعبان

عبدالرحمن:لا

سها:هو لازم يعني يقولك انا تعبان مجايز مخبي عليك

عبدالرحمن:بقولك مكانش تعبان دا كان بيقول انه فرط كتير.....فرط اوي .....ياتري فرط في ايه

سها:******** هتلاقيه كان عايز يعزمني علي حاجه في الحفله وفرط في حقنا

عبدالرحمن:انا مبهزرش دلوقتي بجد محمود ماااااااااات

سها:خلاص ياسيدي انا لله وانا اليه راجعون علي العموم ابقى اديني رقم خالتك عشان اعزيها واجب برده وللا انت ايه رايك

عبدالرحمن:انا كنت مصدوم من ردها انا تايه وخايف وعايز اعرف محمود فرط في ايه والاقيها بتهزر
فقولتلها خلاص ياسها عايزه حاجه تانيه

سها:اه شوفت نسيتني كنت هقولك ايه انت عارف طبعا الاجازه قربت تخلص وندخل الكليه بقى والمذاكره وكده فقولت لبابا اننا نروح مصيف وقلتله ان انت تبقى معانا
فوافق فقلت اتصل بيك
افرحك.......... ها ايه رايك؟!!!


عبدالرحمن:تفرحيني بأيه بقولك محمود مات مات

سها:وانا كنت قلتك يعني انه مامتش ماشي ياسيدي خلاص مكلنا هنموت عايزني اعمل ايه تاني قولي؟!!! انت بقيت غريب اوي علي العموم انا مستنيه ردك بس متتاخرش عليه يلا سلام

عبدالرحمن :انا قفلت معاها وانا مصدوم وزادت حيرتي اكتر............ ممكن محمود فعلا كان تعبان طب فرط في ايه ياتري ايه الصح وايه الغلط ......وايه رد سها دي كمان هو اللي بعمله انا وهي صح ومن حقنا

محمد:سؤال يعني؟ هي البت دي معندهاش دم

عبدالرحمن:انا وهي معندناش دم بس الفرق انا شوفت محمود وهي ماشفتوش انا حسيت بحرقه كلامه وندمه علي التفريط وهي ماحسيتش بحاجه.... بص انا والله مشفق عليها جدااااا ربنا
يهديها هي عامله زي الي بتدور علي حد يحسسها بوجودها زي بالظبط عايشه في غربه تايهه في دنيا غريبه عايشه في بيتها زيي .......ممكن اهلنا يحسوا ان اثاث البيت اتغير بس
مايحسوش بوجودنا ولا بحالنا ............الحمد لله رب العالمين

محمد:طب وانت ليه ماتحاولش معاها

عبدالرحمن:هقولك بعدين اجابة السؤال ده عشان مانخرجش بره الحكايه وترجع تزعل وتقولي انت كل يوم بتعلقني
بعد مكالمه سها اكتشفت ان الساعه بقت 30/3 الصبح اتفزعت جدا وقلت ايه ده انا كل ده بلف في الشارع وقررت اني اروح
ولما وصلت البيت لقيتهم في انتظاري وكأني عملت جريمه

وبابا سألني بصوت شديد وانا اصلا مكانش مستحمل اي كلام ومكنتش عايز اكلم اي حد

سياده البيه ممكن يقولي كان فين ومحضرش جنازه ابن خالته

اسماء اختي ترد بكل سخريه:اكيد كان مع البت بتاعته مهو معدش في دم اليومين دول

انا ماردتش عليهم يظهر ان حتي دموعي معادتش بتتشاف ودخلت اوضتي وقفلت عليا الباب طبعا بابا قعد يزعق بس انا خلاص معادش يفرق معايا

وانا في اوضتي رجعت تاني للحيره اللي كنت فيها وهمي زاد اكتر من مقابله ابويا واستهزاء اسماء

هما بيعملوا فيه كده ليه حد يجاوبني....وقعدت اعيط كتير....... واقول لنفسي هو انا اللي مكبر الموضوع وللا الموضوع فعلا كبير

محمود مات وفرط كتير .....

وسها تقولي انا عايزاك تسافر معانا..... وابويا يزعقلي ......واختي اسماء دي كمان نقصاها الحكايه
وافتكرت يوم حادثه الاتوبيس واحنا راجعين من الرحله يوم مالشاب قعد يتكلم واحنا

مانتبهناش لكلامه وكان الاتوبيس هيعمل حادثه....... ده كمان كان ايه..... ومحمود مات وانا ....ممكن كنت ابقى مكانه
ياااااااااااااارب اعمل ايه .........حسيت اني اول مره اقول يارب من قلبي واستغربت نفسي وانا بقول كده

ومن كتر العياط حسيت اني مصدع وغلبني النوم

وانا نايم حلمت ........

محمد:حلمت بأيه

عبدالرحمن : حلمت بمحمود ......قعدت انادي عليه لقيته بيقولي ألحق نفسك ياعبدالرحمن
قبل فوات الاوان
ألحق نفسي.....ألحق نفسي ازاي.......... طب قولي انت فرطت في ايه.......ها يا محمود فرطت في ايه قولي

وسمعت صوت بيناديني بيقولي البدايه من هنا وشاور علي جامع

انا مانتبهتش للصوت وقعدت انادي علي محمود انت فرطت في ايه قولي .......ومحمود كان للاسف ساكت قعدت انادي عليه كتير وبصوت عالي وهو ساكت

محمد:سؤال محرج يعني هو انا كنت فين من كل ده؟

عبدالرحمن:انت كنت الجزء اللي لازم يتقطع

محمد:يتقطع............ يعني ايه؟؟؟


يتبع ان شاء الله
avatar
زهرة الإسلام
وسام التميز والإبداع
وسام التميز والإبداع

عدد المساهمات : 57
نقاط : 2807
السٌّمعَة : 7
تاريخ التسجيل : 12/08/2010

الرجوع الى أعلى الصفحة اذهب الى الأسفل

رد: أنا مش ورقة!!! (رائعة بإذن الله)

مُساهمة من طرف زهرة الإسلام في السبت أغسطس 21, 2010 11:47 pm

الحلقة الثامنة

محمد:يعني ايه الجزء السليم اللي لازم يتقطع هو احنا مش اصحاب

عبدالرحمن:لا

محمد:أزاي

عبدالرحمن: انت اخويا يامحمد عشان كده كنت لازم اقطعك

محمد:انت كلامك متناقض ازاي بتقول اخوك ودلوقتي تقولي كان لازم اقطع

عبدالرحمن:هتفهم كل حاجه في وقتها ماتستعجلش

محمد:ماشي مع اني زعلان وفي حاجه كمان انت نسيت تقولي انت ماحاولتش مع سها ليه انها تلتزم زيك

عبدالرحمن:اصبر بس انا فاكر مانسيتش
انا بعد ماحلمت الحلم قمت من النوم مفزوع بصيت في الساعه لقيتها 5الصبح قولت ده الميعاد اللي كنت بصلي فيه الفجر في الجامع وافتكرت الصوت اللي كان بيقولي في الحلم الطريق من هنا قلت خلاص انا انزل اصلي الفجر واشوف
قمت اتوضيت وفتحت الباب عشان انزل لقيت ابويا بيقولي وده اختراع جديد سيادتك بقيت بتخرج كمان في الوقت ده

فقلت له :لا يا بابا انا

نازل اصلي الفجر
طبعا هو مصدقنيش وقالي انزل روح زي ماانت عايز واعمل اللي تعمله
انا نزلت الجامع وانا حزين جدا من رد ابويا بس قلت انا هزعل علي ايه وللاايه

محمد:ها وبعدين

عبدالرحمن:لما روحت الجامع كان فاضل على الفجر تقريبا دقايق لقيت راجل هناك وشه كله نور ولحيته بيضه انا كنت بشوفه ايام الثانويه العامه بس انهارده حسيت اني اول مره اشوفه بصلي كده وابتسم وكأنه بيقولي اهلا بيك كنت حاسس انه عايز يكلمني ويقولي مالك يابني السؤال اللي كان نفسي ابويا يسألهولي
ولما اقيمت الصلاة انا مش عارف هو كان قاصد انه يقف جمبي فعلا ولاايه.....
المهم
الامام كان بيقرا بالأيات دي وكأني اسمعها الان يوم سمعتها منه كانت كأنها طرقات

قُلْ يَا عِبَادِي الَّذِينَ أَسْرَفُوا عَلَى أَنْفُسِهِمْ لا تَقْنَطُوا مِنْ رَحْمَةِ اللَّهِ إِنَّ اللَّهَ يَغْفِرُ الذُّنُوبَ جَمِيعاً إِنَّهُ هُوَ الْغَفُورُ الرَّحِيمُ53
وَأَنِيبُوا إِلَى رَبِّكُمْ وَأَسْلِمُوا لَهُ مِنْ قَبْلِ أَنْ يَأْتِيَكُمْ الْعَذَابُ ثُمَّ لا تُنْصَرُونَ54
وَاتَّبِعُوا أَحْسَنَ مَا أُنْزِلَ إِلَيْكُمْ مِنْ رَبِّكُمْ مِنْ قَبْلِ أَنْ يَأْتِيَكُمْ العَذَابُ بَغْتَةً وَأَنْتُمْ لا تَشْعُرُونَ55
أَنْ تَقُولَ نَفْسٌ يَا حَسْرَتَا عَلَى مَا فَرَّطْتُ فِي جَنْبِ اللَّهِ وَإِنْ كُنْتُ لَمِنْ السَّاخِرِينَ56
أَوْ تَقُولَ لَوْ أَنَّ اللَّهَ هَدَانِي لَكُنْتُ مِنْ الْمُتَّقِينَ57
أَوْ تَقُولَ حِينَ تَرَى الْعَذَابَ لَوْ أَنَّ لِي كَرَّةً فَأَكُونَ مِنْ الْمُحْسِنِينَ 58
بَلَى قَدْ جَاءَتْكَ آيَاتِي فَكَذَّبْتَ بِهَا وَاسْتَكْبَرْتَ وَكُنْتَ مِنْ الْكَافِرِينَ59
وَيَوْمَ الْقِيَامَةِ تَرَى الَّذِينَ كَذَبُوا عَلَى اللَّهِ وُجُوهُهُمْ مُسْوَدَّةٌ أَلَيْسَ فِي جَهَنَّمَ مَثْوًى لِلْمُتَكَبِّرِينَ 60
وَيُنَجِّي اللَّهُ الَّذِينَ اتَّقَوا بِمَفَازَتِهِمْ لا يَمَسُّهُمْ السُّوءُ وَلا هُمْ يَحْزَنُونَ (61
اللَّهُ خَالِقُ كُلِّ شَيْءٍ وَهُوَ عَلَى كُلِّ شَيْءٍ وَكِيلٌ (62
لَهُ مَقَالِيدُ السَّمَوَاتِ وَالأَرْضِ وَالَّذِينَ كَفَرُوا بِآيَاتِ اللَّهِ أُوْلَئِكَ هُمْ الْخَاسِرُونَ (63

الامام قرا بالايات دي في الركعه الاولى وانا في ذهول هو التفريط كان في جنب الله التفريط كان في جنب الله وانا ساجد قولت يارب انا ازاي فرطت في جنبك وبكيت كتير ازاي فرطت

كنت حاسس وانا ساجد ان الراجل اللي جه وقف حنبي ده كان سامعني بس انا مكنتش قادر املك نفسي من البكاء
وفي الركعه التانيه اكمل الامام باقي سورة الزمر وكانت دي طرقه تانيه علي دماغي

قُلْ أَفَغَيْرَ اللَّهِ تَأْمُرُونَنِي أَعْبُدُ أَيُّهَا الْجَاهِلُونَ (64
وَلَقَدْ أُوحِيَ إِلَيْكَ وَإِلَى الَّذِينَ مِنْ قَبْلِكَ لَئِنْ أَشْرَكْتَ لَيَحْبَطَنَّ عَمَلُكَ وَلَتَكُونَنَّ مِنْ الْخَاسِرِينَ (65
بَلْ اللَّهَ فَاعْبُدْ وَكُنْ مِنْ الشَّاكِرِينَ (66
وَمَا قَدَرُوا اللَّهَ حَقَّ قَدْرِهِ وَالأَرْضُ جَمِيعاً قَبْضَتُهُ يَوْمَ الْقِيَامَةِ وَالسَّموَاتُ مَطْوِيَّاتٌ بِيَمِينِهِ سُبْحَانَهُ وَتَعَالَى عَمَّا يُشْرِكُونَ (67

واكمل الامام القراءة الي نهايه السوره وبعد مانتهينا من الصلاه
زادت حيرتي هو انا ممكن اكون بعبد حاجه تانيه غير ربنا؟ازاي ده
هو انا مش مقدر ربنا حق قدره وازاي اقدره حق قدره؟!!!
يارب انا ازاي فرط في حقك؟؟؟
في الحلم قال البدايه من هنا طب هي فين البدايه دي؟؟؟
فين حد يجاوبني علي الاسئله دي
انا ازاي فرطت واشركت مع ربنا وازاي مقدرتش ربنا حق قدره ازاي ....ازاي...... فين الاجابه
لقيت الراجل اللي جنبي بيقولي: ازيك يابني انت كنت فين؟ وحشتيني

وانا في سري :وحشتك ايه هو انت تعرفني سيبني في اللي انا فيه وماردتش عليه

لقيته بيقولي: بص يابني انا اسمي الحاج حسين انا معنديش اولاد ويشرفني انك تبقي ابني وانا يسعدني انك تعتبرني زي ابوك

انا كل ده ساكت ومستغرب قلت هو يعرفني منين عشان يقولي الكلام ده وبعدين زي ابويا ايه انا خلاص مش عايز اكلم حد ومبصدقش حد مفيش حد في الدنيا دي فاهمني ولا بيحبني دا ابويا حتى قالي روح زي ماانت عايز .........

لقيته بيقولي :علي العموم يابني انا هنا وقت كل صلاة لو احتاجت اي حاجه وقام وسابني وراح قعد في ركن من اركان الجامع

انا قمت عشان اروح وانا في طريق للبيت

قعدت اسال نفسي يمكن تكون عند الراجل ده الاجابه ولاايه
بس انا كنت تعبان قوي مكنتش حتي قادر افكروكأن الايات كانت ضربات على راسي والراجل ده كمان قال ايه عايز يعتبرني ابنه
اذا كان اللي عندهم عيال متبريين منهم دا بقى عايز يعتبرني ابنه دنيا عجب والله

ولما روحت البيت لقيت سها بعتالي رساله بتقولي اكيد انت طبعا دلوقتي اعصابك ارتاحت ونسيت اللي حصل انا واثقه ومنتظره ردك بالموافقة علي السفر

محمد:طب وعملت ايه بعد كل ده ربنا يكون في عونك

يتبع ان شاء الله
avatar
زهرة الإسلام
وسام التميز والإبداع
وسام التميز والإبداع

عدد المساهمات : 57
نقاط : 2807
السٌّمعَة : 7
تاريخ التسجيل : 12/08/2010

الرجوع الى أعلى الصفحة اذهب الى الأسفل

رد: أنا مش ورقة!!! (رائعة بإذن الله)

مُساهمة من طرف أبويوسف في الخميس سبتمبر 16, 2010 2:01 pm

زهرة تسلمي على المجهود الطيب الذي تبذلينه في المنتدى

ولكن هل الى هنا انتهى الموضوع ولا له تكملة فيما بعد

جزاكي الله كل خير ودمتي بالف خير


*****************************************************
avatar
أبويوسف
نائب المدير العام
نائب المدير العام

عدد المساهمات : 449
نقاط : 3840
السٌّمعَة : 19
تاريخ التسجيل : 24/03/2010
العمر : 40

الرجوع الى أعلى الصفحة اذهب الى الأسفل

رد: أنا مش ورقة!!! (رائعة بإذن الله)

مُساهمة من طرف أبويوسف في الإثنين ديسمبر 20, 2010 2:38 pm

نتمنى عودة وسام الابداع والتميز

لتكملة السلسلة التي بدأتها

كما نتمنى لها كل التوفيق اينما كانت

والله ولي التوفيق


*****************************************************
avatar
أبويوسف
نائب المدير العام
نائب المدير العام

عدد المساهمات : 449
نقاط : 3840
السٌّمعَة : 19
تاريخ التسجيل : 24/03/2010
العمر : 40

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى